full screen background image
Search

तिन दशक देखि निर्माणाधिन बिमान स्थल २ महिना भित्र टेष्ट फ्लाइटकाे अासमा

suntharali-biman२४ मंसिर २०७३ कालिकोट/संस्कृति, पर्यटन तथा नागरिक उड्डयनमन्त्री जीवन बहादुर शाहीले कालिकोटको एक मात्र निर्माणाधिन सुनथराली विमान स्थल आफ्नै कार्यकालमा सम्पन्न गरिसक्ने प्रतिवद्धता गर्नु भएको ४ महिना नवित्दै विमान टेष्ट फ्लाईटका लागि ८० प्रतिशत काम सम्पन्न भैसकेको धावनमार्ग निर्माणकार्यको नेतृत्व गरिरहेका डन्डमान महताराले बताउनु भएको छ । विगत ३ दशकदेखि निर्माणाधिन अवस्थामा रहेको विमान स्थल आफ्नै कार्यकालमा सम्पन्न गरिसक्न मन्त्री शाहीले भाद्र १६ गते गरेको घोषणा अनुसार मन्त्रालयको निर्देशनमा टेष्ट फ्लाईटका लागि ८० प्रतिशत काम सम्पन्न भैसकेको महताराले बताउनु भएको हो ।

यता ६९० मिटर लम्बाई ५६ मिटर चौडाई धावन मार्ग रहेको विमान स्थलमा ३०० मिटर लम्बाई फिनिसीं भैसकेकाले बाकी काम फिनिसींमै रहेकाले माघ भित्र काम सम्पन्न गरी टेष्ट फ्लाईट गरिसक्ने संस्कृति, पर्यटन तथा नागरिक उड्डयनमन्त्री जीवन बहादुर शाहीका नीजि सचिवालय सदस्य दमन बहादुर शाहीले बताउनु भएको छ । सेराकाली कन्ट्रक्सन प्रा.लि.को ठेक्कामा निर्माणाधिन विमानस्थलमा हाल दैनिक ९० जना बढी कामदारहरु लगाई काम अगाडी बढाईएकाले भनेकै समयमा टेष्ट फ्लाईट गरिसक्ने मन्त्रालयको तयारी रहेको शाहीले बताउनु भएको छ ।

काम चाडै सम्पन्न गरिसक्न मत्रालयको निर्देशन अनुसार काम अगाडी बढीरहे पनि प्रयाप्त कामदारको अभावमा काम सोचे अनुसार हुन नसकेकाे निर्माणधिन स्थलमा काम चलाई रहनु भएका डण्डमान महताराले बताउनु भएको छ । २ करोड १० लाखमा टेन्डर आह्वान भै ३५ प्रतिशत टेन्डर घटेर सेराकाली कन्ट्रक्सन प्रा.लि.ले पारेकाे ठेक्कामा समयमै काम सक्न कामदारको समस्या परे पनि बजेटको भने समस्या नरहेको महताराले बताउनु भएको छ । बिमान स्थल संगै निर्माण हुनुपर्ने भवन निर्माण भैसकेको र रिपीटर टावर, पुलिस क्वाटर र विमानस्थल घेरबार जस्ता काम हुन अझै बाकी रहेको वहाले बताउनु भएको छ ।

३ दशक पहिले बिमान स्थल निर्माणका लागि तत्कालिन प्रतिनिधि सभा सांसद तिलक प्रसाद न्यौपाने र तत्कालिन जिल्ला सभापति दिप बहादुर शाहीको संयुक्त आयोजनामा शिलान्यास गरिएको विमान स्थल निर्माणका लागि करिव १० करोड बरावरको बजेट खर्च भैसकेको थियो भने कामको शिलशिलामा ४१ जना कामदारको अकालमै ज्यान गइसकेको थियो । ज्यान जाने ४१ जना कामदारहरुमध्य ६ जना विमानस्थल कटान गर्ने क्रममा माटोको ढिस्कोले पुरिएर ज्यान गुमाएका थिए भने धादिङ्ग जोगिमारा स्थायी घर भै विमानस्थल निर्माणको शिलशिलामा कोटवाडा आएका ३० जना कामदार र ६ जना स्थानीय कामदारहरुलाई २०५८ सालमा तत्कालिन राज्यपक्षको शाहीसेनाद्धारा विमान स्थलमै गोलिहानी हत्या गरिएको थियो ।



Comments